“Bang Jaka, kereta api tuh hebat ya, tidur aja jalannya kenceng banget apelagi kalo berdiri, pasti lebih kenceng,” kata Adun pada abangnya yang lagi godain cewek yang duduk di depannya.
“Ah elu Dun, kalo kereta jalannye berdiri bisa nyangkut di kabel listrik,” jawab Jaka sambil cengar-cengir ame tuh cewek yang sebel ngeliat tampang Jaka yang pas-pasan.
“Bang, bang aye punya tebakan nih, kalo abang bisa jawab aye kaga gangguin abang ngobrol ame cewek ntu, tapi kalo abang kaga bisa jawab aye bilangin ame nyak, abang godain cewek,” kata Adun pada Jaka yang romannya keki ame adeknye.
“Eh Dun, kalo tebak-tebakan mah abang lu nih jagonye, ayo ape pertanyaannye?” kate Jaka sombong.
“Abang tau kan bantalan rel kereta, nah pertanyaannye, kenape bantalan rel dibuat dari beton atawe balok kayu?” Tanya Adun sambil ikutan cengar-cengir ame cewek yang ditaksir abangnye.
“Pertanyaanlu mah biasa aja, anak SD juga tau kalo bantalan rel dibuat dari beton tuh, biar keretanye kaga ambles,” jawab Jaka yang ngerasa tengsin ame tuh cewek.
“Ya abang jawabnye salah, yang bener kalo bantalan rel dibuat dari busa atau kapuk, bisa-bisa tuh kereta tidurnya pules kaga mao jalan,” kata Adun sambil menghindar dari cubitan abangnya yang keki.
